Inuktitut

ᑕᒪᐃᓐᓄᑦ ᑐᑭᓯᐅᒪᑎᑦᑎᔾᔪᑏᑦ Listen

ᓱᓇᐅᖕᒪᑕ ᓄᓇᑦᓯᐊᕐᒥ ᐃᓄᓕᒫᑦ ᐱᔪᓐᓇᐅᑎᖏᓐᓄᑦ ᒪᓕᒐᐃᑦ?

ᓄᓇᑦᓯᐊᕐᒥ ᐃᓄᓕᒫᑦ ᐱᔪᓐᓇᐅᑎᖏᓐᓄᑦ ᒪᓕᒐᐃᑦ ᓴᐳᔾᔨᔾᔪᑕᐅᔪᑦ ᐊᒻᒪᓗ ᐊᑐᕈᓐᓇᐅᑕᐅᓪᓗᑎᒃ ᐃᓅᖃᑕᐅᓂᑦᑎᓐᓄᑦ ᐱᔪᓐᓇᕐᓂᑦᑎᓐᓂᒃ. ᒪᓕᒐᕐᓂᒃ ᓯᖅᑯᒥᑦᑎᓂᐅᖕᒪᑦ ᐊᑭᕋᖅᑐᖃᑦᑕᕐᓂᖅ ᐅᕙᓘᓐᓃᑦ ᐊᑲᐅᖏᓕᐅᖅᑎᑦᑎᕙᖕᓂᖅ ᐃᓅᖃᑎᑦᑎᓐᓂᒃ ᒪᑯᐊ ᐱᔾᔪᑕᐅᑎᓪᓗᒋᑦ:

  • ᐃᓅᓂᖓ ᖃᓄᐃᑦᑑᓂᖓ, ᐅᕕᓂᖓᑕ ᑲᓚᖓ, ᓯᕗᓪᓕᕕᓂᖃᕐᓂᖓᓄᑦ, ᓇᑭᖔᕐᓂᑰᓂᖓᓄᑦ, ᓇᒥ ᐃᓅᓂᑰᓂᖓ ᐊᒻᒪᓗ ᓇᓂ ᓄᓇᕐᔪᐊᕐᒥᖔᕐᓂᑰᓂᖓᓄᑦ ᐱᔾᔪᑎᖃᖅᑐᓂᒃ.
  • ᐊᕐᓇᐅᓂᖓᓄᑦ, ᐊᖑᑎᐅᓂᖓᓄᑦ, ᐊᖑᑎᓂᒃ ᐱᖃᑎᖃᓲᖑᓂᖓᓂᒃ, ᐊᕐᓇᓂᒃ ᐱᖃᑎᖃᓲᖑᓂᖓᓂᒃ, ᐊᖑᑎᐅᖃᑎᒥᓂᒃ ᐱᖃᑎᖃᓲᓂᖓᓂᒃ, ᐊᕐᓇᐅᖃᑎᒥᓂᒃ ᐱᖃᑎᖃᓲᖑᓂᖓᓂᒃ, ᐅᕙᓘᓐᓃᑦ ᐊᕐᓇᐅᓂᕋᕐᓂᖓᓄᑦ, ᐊᖑᑕᐅᓂᕋᕐᓂᖓᓄᓪᓗᓐᓃᑦ
  • ᐃᓚᖃᕐᓂᖓᓂᒃ ᑲᑎᑎᑕᐅᓯᒪᓂᖓᓂᒡᓗᓐᓃᑦ ᑲᑎᑎᑕᐅᓯᒪᙱᓐᓂᖓᓂᒡᓗᓐᓃᑦ, ᖃᑕᖑᑎᒥᓂᒃ ᐃᓚᖃᕐᓂᖓᓄᓗᓐᓃᑦ.
  • ᐃᓅᓯᕐᒥᓂ ᖃᓄᐃᓐᓂᖓᓄᑦ, ᐊᔪᖅᓴᖅᐸᑦ ᐊᔪᖅᓴᙱᑉᐸᓪᓗᓐᓃᑦ.
  • ᐅᒃᐱᕐᓂᖃᕐᓂᕐᒧᑦ.
  • ᒐᕙᒪᐅᔪᓂᒃ ᐅᒃᐱᕆᔭᖃᕐᓂᖓᓂᒃ ᐃᓚᒋᔭᐅᓂᖓᓂᒡᓗᓐᓃᑦ.
  • ᐲᕋᔭᖕᓂᕕᓂᕐᒧᑦ ᐸᓯᔭᐅᓯᒪᓂᕕᓂᖓᓄᑦ ᐲᖅᑕᐅᓯᒪᔪᒥᒃ ᐃᓱᒪᒋᔭᐅᔪᓃᕐᓂᒃᑯᔪᒥᒃ.
  • ᑎᒥᒃᑯᑦ/ᐃᓱᒪᒃᑯᑦ ᐊᔪᕈᑎᖃᕐᓂᖓᓄᑦ.
  • ᐅᑭᐅᖃᕐᓂᖓᓄᑦ.

ᒪᓕᒐᕐᓂᒃ ᓯᖅᑯᒥᑦᑎᓂᐅᕗᖅ ᐃᓄᓕᒫᑦ ᐱᔪᓐᓇᐅᑎᖏᓐᓂᒃ ᒪᓕᒐᕐᓂᒃ ᐊᑭᕋᖅᑐᖅᑐᖃᖅᐸᑦ ᐃᓄᖕᓂᒃ, ᑕᓪᓕᒪᐅᔪᓂᒃ ᐃᓚᒋᔭᐅᔪᓂᒃ ᒪᑯᓇᓂ:

  1. ᐃᖃᓇᐃᔭᕐᕕᖓᓂ/ᓴᓇᕕᖓᓂ ᐊᒻᒪᓗ ᐃᖃᓇᐃᔮᒃᓴᖅᓯᐅᕐᓂᖓᓂ/ᓴᓇᔭᒃᓴᖅᓯᐅᕐᓂᖓᓂ.
  2. ᐊᑐᖅᑐᐊᖅᑎᑦᑎᓂᐊᕐᓗᓂ ᐊᖏᕐᕋᕆᔭᐅᔪᒥᒃ ᐅᕙᓘᓐᓃᑦ ᐃᖃᓇᐃᔭᕐᕕᒃᓴᒥᒃ/ᓴᓇᕕᒃᓴᒥᒃ.
  3. ᐃᓚᓕᐅᑎᓯᒪᔪᕐᓇᕐᓂᕐᒥᒃ ᓴᓇᔩᑦ ᐅᕙᓘᓐᓃᑦ ᐃᓕᓐᓂᐊᖅᓯᒪᒃᑯᑖᒃᑐᓂ ᐃᖃᓇᐃᔭᖃᖅᑐᑦ ᑲᑐᔾᔨᖃᑎᒌᖏᓐᓂᒃ.
  4. ᐃᓄᓕᒫᕐᓄᑦ ᐱᔨᑦᑎᕋᐃᓂᕐᒥᒃ ᐃᖃᓇᐃᔮᖑᕙᒃᑐᓂ, ᓲᕐᓗ ᐋᓐᓂᐊᖅᑐᓕᕆᓂᕐᒥ, ᐃᓕᓐᓂᐊᕐᓂᓕᕆᓂᕐᒥᒃ, ᐃᓄᓕᔨᐅᓂᕐᒥᓗᓐᓃᑦ.
  5. ᐊᒥᓱᓕᐊᖑᓯᒪᔪᓂ ᓴᕿᔮᖅᑎᑕᐅᓂᐊᖅᑐᓂ ᓲᕐᓗ ᐅᖃᓕᒫᒐᕐᓂ ᐱᕙᓪᓕᐊᔪᓂᒃ, ᐅᖃᓕᒪᒐᕋᓛᕐᓂᒃ, ᐅᖃᓕᒫᒐᓂᒃ, ᐅᕙᓘᓐᓃᑦ ᓇᓗᓇᐃᒃᑯᑕᕐᓂᒃ.

ᖃᓄᖅ ᑐᑭᖃᖅᐸ ᐊᑭᕋᖅᑐᐃᓂᕋᐃᓂᖅ?

ᐊᑭᕋᖅᑐᐃᓂᖅ ᑐᑭᖃᖅᑐᖅ ᐃᓱᒪᑲᐅᑎᒋᖃᑦᑕᕐᓂᕐᒥᒃ ᐱᐅᖏᑦᑐᓂᒃ ᐃᓄᖕᒥᒃ ᐃᓄᖕᓂᒡᓗᓐᓃᑦ ᐱᑦᑎᐊᖅᑕᐅᖏᓪᓗᑎᒡᓗ, ᐲᔭᕆᔭᐅᖃᑕᖅᑎᓪᓗᒋᑦ, ᐊᑲᐅᖏᓕᐅᖅᑎᑕᐅᓂᖏᓐᓂ ᐅᕙᓘᓐᓃᑦ ᐃᑲᔪᖅᑕᐃᓕᒪᓂᕐᒥᒃ ᑕᐃᒃᑯᓂᖓ ᐱᖃᑦᑕᕆᐊᖃᖅᑕᖏᓐᓂᒃ.

ᑕᒡᕙ ᐱᖓᓱᑦ ᐆᒃᑑᑎᙳᐊᑐᐃᓐᓇᐃᑦ ᐊᑭᕋᖅᑐᐃᓂᕐᒥᒃ ᐅᓂᒃᑳᙳᐊᖅᑐᑦ.

  1. ᓇᖕᒥᓂᖃᖅᑐᖅ ᐅᕙᓘᓐᓃᑦ ᐊᐅᓚᑦᑎᔨᐅᔪᖅ ᐊᑐᖅᑐᐊᖅᑎᑦᑎᔾᔮᖏᑦᑐᖅ ᐃᓄᖕᓂᒃ ᐊᔪᖅᓴᖅᑐᖅᓯᐅᑎᓂᒃ ᑮᓇᐅᔭᖅᑖᖅᑲᑦᑕᖅᑐᓂᒃ ᐅᒃᐱᕆᓪᓗᒍ ᐱᑦᑎᐊᔾᔮᖏᓐᓂᖏᑦ ᐊᒻᒪᓗ ᐊᑭᓖ]ᔮᖏᓐᓂᖏᓐᓂᒃ ᐃᒡᓗᒧᑦ ᐊᑭᓕᐅᑎᒃᓴᓂᑦ ᐊᑐᖅᑐᐊᕐᓂᕐᒥᓄᑦ.
  2. ᐃᓄᓕᒫᕐᓄᑦ ᐃᓕᓐᓂᐊᕐᕕᒃ ᐃᖃᓇᐃᔭᖅᑎᑦᑎᔾᔮᖏᑦᑐᖅ ᐊᕐᓇᒥᒃ ᐃᓕᓴᐃᔨᒥᒃ ᐊᕐᓇᐅᖃᑎᒥᓂᒃ ᐱᖃᑎᖃᓲᖑᓂᖓᓄᑦ ᐱᔾᔪᑕᐅᓗᓂ ᐃᓱᒪᒋᔭᐅᓂᖓ ᐱᐅᔪᓃᖅᑎᑦᑎᔪᓐᓇᕐᓂᖓ ᐃᓕᓐᓂᐊᖅᑎᑕᒥᓂᒃ.
  3. ᐃᖃᓇᐃᔭᕐᕕᖕᒥ ᐊᕐᓇᖅ ᐊᕕᑕᐅᔪᖅ ᓯᙵᐃᓕᕐᓂᖓᓄᑦ/ᓇᔾᔨᓕᕐᓂᖓᓄᑦ.

ᓱᓇᐅᖕᒪᑕ ᓄᓇᑦᓯᐊᕐᒥ ᐃᓄᓕᒫᑦ ᐱᔪᓐᓇᐅᑎᖏᓐᓄᑦ ᑲᑎᒪᔩᑦ?

ᐃᓄᓕᒪᑦ ᐱᔪᓐᓇᐅᑎᓕᕆᔨᖏᓐᓄᑦ ᑲᑎᒪᔨᕐᔪᐊᑦ ᑲᑎᒪᔨᐅᔪᑦ ᑎᒥᐅᓪᓗᑎᒃ ᐃᖕᒥᒃᑰᖓᔪᑦ ᒐᕙᒪᒃᑯᓐᓄᑦ ᐃᓚᒋᔭᐅᖏᖢᑎᒃ.

ᐃᓄᓕᒫᑦ ᐱᔪᓐᓇᐅᑎᓕᕆᔨᖏᑦ:

  • ᖃᐅᔨᓴᖅᑎᐅᔪᑦ ᒪᓕᒃᑕᐅᖕᒪᖔᑕ ᓄᓇᑦᓯᐊᕐᒥ ᐃᓄᓕᒫᑦ ᐱᔪᓐᓇᐅᑎᖏᓐᓄᑦ ᒪᓕᒐᐃᑦ.
  • ᐃᑲᔪᖅᑎᐅᔪᑦ ᐃᓄᖕᓂᒃ ᑐᑭᓯᐅᒪᓂᖅ ᐃᓄᓕᒫᑦᑎᐊᑦ ᐱᔪᓐᓇᐅᑎᖏᓐᓂᒃ, ᒪᓕᒐᖏᓐᓂᒃ, ᖃᓄᕐᓗ ᒪᓕᒐᐃᑦ ᐊᑐᖅᑕᐅᓲᖑᖕᒪᖓᑕ.
  • ᐃᑲᔪᖅᐸᒃᑐᑦ ᐃᓄᖕᓂᒃ ᑐᑭᓯᐊᓂᖅ ᓱᓇᐅᖕᒪᖔᑕ ᐅᓐᓂᕐᓘᑕᐅᔪᑦ ᖃᓄᕐᓗ ᐅᓐᓂᕐᓗᑎᓕᐅᕈᓐᓇᕐᒪᖔᑕ.
  • ᑲᒪᔨᐅᕙᒃᑐᑦ ᐋᕿᒃᑕᐅᑎᑦᑎᓲᖑᓪᓗᑎᒡᓗ ᐅᓐᓂᕐᓘᑕᐅᓯᒪᔪᓂᒃ.
  • ᐃᑲᔪᖅᓱᐃᓂᖅᓴᐅᕙᖏᑦᑐᑦ ᐅᓐᓂᕐᓗᒃᑐᖃᖅᑐᒥᒃ ᐱᒋᐊᖅᑎᑦᑎᔪᖃᖅᑎᓪᓗᒍ. ᐱᔪᓐᓇᐅᑎᓕᕆᔨᒃᑯᑦ ᐃᑲᔪᖅᓱᐃᓂᖅᓴᐅᕙᖏᑦᑐᑦ ᓇᓪᓕᐊᖕᓂᑐᐃᓐᓇᖅ.

ᓱᓇᐅᖕᒪᑕ ᐅᓐᓂᕐᓘᑏᑦ?

ᐅᓐᓂᕐᓘᑎᓕᐅᕈᓐᓇᖅᑐᑦ ᐅᒃᐱᕈᓱᒃᑯᕕᑦ ᐃᓄᒃ, ᐃᓄᐃᑦ, ᑎᒥᐅᔪᓪᓘᓐᓃᑦ ᓯᖁᒥᑦᑎᓯᒪᓂᖏᓐᓂᒃ ᒪᓕᒐᕐᓂᒃ ᐃᓕᖕᓂᒡᓗ ᐊᑭᕋᖅᑐᕐᓂᙱᓂᒃ. ᐊᑭᖃᖃᑦᑕᖏᑦᑐᖅ ᐅᓐᓅᓗᒍᑎᓕᐅᕐᓂᖅ. ᐅᓐᓂᕐᓘᑎᓕᐊᕆᔭᐃᑦ ᓴᕿᑦᑐᓐᓇᖅᑕᐃᑦ ᒪᕐᕉᒃ ᐊᕐᕌᒎᒃ ᑭᖑᓂᐊᓂ ᐊᑭᕋᖅᑐᖅᑕᐅᓚᐅᖅᑎᓪᓗᑎᑦ.

ᐆᓐᓂᕐᓘᑎᓕᐊᖑᔪᑦ ᐱᕙᓪᓕᐊᓂᖏᑦ ᑕᓪᓕᒪᐃᓕᖃᖓᔪᓐᓇᖅᑐᑦ ᐃᒫᒃ:

  1. ᑭᓇᑐᐃᓐᓇᖅ ᐊᑭᕋᖅᑐᖅᑕᐅᓯᒪᓂᑰᔪᖅ ᑎᑎᕋᕐᓗᓂ ᑕᑕᑎᕆᓂᐊᖅᑐᖅ ᐅᓐᓂᕐᓘᑎᓕᐅᕐᓂᕐᒧᑦ ᑕᑕᑎᒐᒃᓴᓂᒃ ᑎᑎᖃᓂᒃ ᓇᒃᓯᐅᑎᓕᓂᒋᓪᓗ ᑐᓂᓗᒋᓗᓐᓃᑦ ᐱᔪᓐᓇᐅᑎᓕᕆᔨᕐᔪᐊᒃᑯᓐᓄᑦ. ᐱᔪᓐᓇᐅᑎᓕᕇᑦ ᐃᖃᓇᐃᔭᖅᑎᖏᑦ ᐃᑲᔪᕈᓐᓇᖅᑐᑦ ᐃᓕᖕᓂᒃ ᑕᑕᑎᕆᓂᕐᒥᒃ ᐅᓐᓂᕐᓘᑎᓂᒃ. ᓇᖕᒥᓂᖅ ᓴᕿᑦᑎᓂᐊᖅᑐᑎᑦ ᐅᓐᓂᕐᓘᑎᒥᒃ. ᐃᓄᒃ ᐊᓰᑦ ᐅᓐᓂᕐᓘᑎᓕᐅᕈᓐᓇᖏᑦᑐᖅ ᐊᓯᒥᓂᒃ ᐱᔾᔪᔾᔨᓗᓂ.
  2. ᐊᐅᓚᑦᑎᔨᖓᑦ ᐱᔪᓐᓇᐅᑎᓕᕆᔨᕐᔪᐊᒃᑯᓐᓂ ᕿᒥᕐᕈᐊᕐᓂᐊᖅᑐᖅ ᐅᓐᓂᕐᓘᑕᐅᓯᒪᔪᓂᒃ ᖃᐅᔨᒋᐊᕐᓗᓂᒋᑦ ᒪᓕᒐᕐᓂᒃ ᐃᓚᒋᔭᐅᖕᒪᖔᑦ ᐅᓐᓂᕐᓘᑕᐅᔪᓐᓇᖅᑐᓂ.
  3. ᐊᐅᓚᑦᑎᔨ ᑎᒃᑯᐊᖅᓯᓂᐊᖅᑐᖅ ᐋᖀᖃᑎᒌᒃᑎᐅᓂᐊᖅᑐᒥᒃ ᐃᖃᖅᑐᐃᔨᙳᐊᕐᒥᒃ ᐋᕿᒃᑕᐅᖁᓗᒍ ᐅᓐᓂᕐᓘᑕᐅᓯᒪᓕᖅᑐᖅ.
  4. ᓂᑲ0    ᐊᐅᓚᑦᑎᔨ ᑎᒃᑯᐊᖅᓯᓂᐊᖅᑐᖅ ᖃᐅᔨᓴᖅᑎᒥᒃ ᐊ]ᖀᖃᑎᒌᒍᓐᓇᑉᐸᑕ.
  5. ᖃᐅᔨᓴᖅᑕᐅᕌᓂᒃᐸᑦ, ᐃᖃᖅᑐᐃᕕᒃᑯᑦ  ᑐᑭᓕᐅᖅᑕᐅᓂᐊᖅᑐᖅ ᐃᓱᒪᓕᐅᖅᑕᐅᓗᓂ ᒪᓕᒐᕐᒥᒃ ᓯᖅᑯᒥᑦᑎᓯᒪᔪᖃᕐᒪᖔᑦ.

ᐅᖃᖃᑎᒋᓗᒋᑦ ᐱᔪᓐᓇᐅᑎᓕᕆᔨᕐᔪᐊᒃᑯᑦ ᐱᔪᒪᓗᑎᑦ ᐅᓐᓂᕐᓘᑎᓕᐅᕐᓂᕐᒧᑦ ᑕᑕᑎᒐᒃᓴᓂᒃ ᐃᓕᓐᓂᐊᒃᑲᓐᓂᕐᓗᑎᓪᓗ ᐅᓂᕐᓘᑎᓕᐅᕈᓐᓇᕐᓂᕐᒥᒃ ᖃᓄᐃᓕᐅᕆᐊᖃᕐᒪᖔᖅᐱᑦ ᐊᒻᒪᓗ ᓄᓇᑦᓯᐊᕐᒥ ᐃᓄᓕᒫᑦ ᐱᔪᓐᓇᐅᑎᖏᓐᓂᒃ ᒪᓕᒐᕐᓂᒃ ᑐᑭᓯᑦᑎᐊᒃᑲᓂᕐᓂᐊᕋᕕᑦ.

ᐅᑯᓂ ᐱᔪᒪᒍᔅᓯ ᐊᓯᐊᓂᒃ ᐅᖃᐅᓯᕐᒥᒃ ᐊᑐᖅᑐᒥᒃ, ᐅᖃᖃᑎᖃᕐᓗᑎᑦ ᐅᕙᓂ 1-888-669-5575.